KZ
Қазақстанда алғаш рет мемлекеттік мектеп базасында жүзеге асқан KUMON пилоттық жобасы оқушылардың математикаға деген қызығушылығын арттырып, білім сапасының жақсарғанын көрсетті. Жоба мектебіміздің 3-сынып оқушылары арасында өткізіліп, алты ай ішінде айтарлықтай нәтижелерге қол жеткізілді.
Бағдарлама аясында оқушылар күн сайын небәрі 15 минут KUMON әдістемесі бойынша математика тапсырмаларын орындады. Жоба Caravan of Knowledge ұйымының ұйымдастыруымен, Chevron және INPEX компанияларының қолдауымен жүзеге асты.
KUMON — әлемнің 60-тан астам елінде қолданылатын халықаралық білім беру жүйесі. Оның басты ерекшелігі — әр баланың өз деңгейіне сай, жеке қарқынмен білім алуына мүмкіндік беру. Әдістеме оқушының тек математикалық қабілетін ғана емес, сонымен қатар тәртіп, жауапкершілік, зейін және өздігінен оқу дағдыларын дамытуға бағытталған.
Жоба нәтижелері бойынша оқушылардың есеп шығару жылдамдығы мен дәлдігі айтарлықтай артқан. Бағалау тесттерінің қорытындысы KUMON бағдарламасына қатысқан оқушылардың басым бөлігі жоғары нәтижеге жеткенін көрсетті. Кейбір оқушылар өз сынып деңгейінен бірнеше саты жоғары материалдарды меңгере бастады.
Мұғалімдердің айтуынша, балалардың сабаққа деген ынтасы күшейіп, математикадан қорқу сезімі азайған. Олар оқушылардың уақытты тиімді пайдаланып, тапсырмаларды өз бетінше орындауға дағдыланғанын атап өтті.
Ата-аналар да жобаға оң баға берді. Сауалнамаға қатысқан ата-аналардың көпшілігі балаларында есептеу қабілетінің, логикалық ойлаудың және математикаға қызығушылықтың артқанын атап өтті. Кейбір ата-аналар балалардың өздігінен оқуға бейімделе бастағанын ерекше атап өтті.
Мамандардың пікірінше, KUMON әдісі Қазақстандағы білім беру жүйесіне тиімді қосымша құрал бола алады. Бағдарлама оқу жоспарын өзгертуді талап етпейді және мұғалімдерге қосымша ауыртпалық түсірмей, оқушылардың базалық білімін нығайтуға мүмкіндік береді.
